القاهرة – مصطفى المصري:
في قلب شوارع القاهرة، حيث تعبق الروائح الشعبية الشهية، انطلقت منذ ما يقرب من نصف قرن حكاية عربية كبدة صغيرة، تحوّلت مع الزمن إلى واحدة من أبرز العلامات التجارية في عالم الأطعمة السريعة في مصر.
نلتقي اليوم مع أحد أبناء مؤسس عز المنوفي مستر محمد عز، ليحدثنا عن البداية، وأسرار النجاح، وخطط التوسع المستقبلي.
يحدثنا مستر محمد عز عن العلامة التي بدأت من حي الدقي، أصبحت اليوم تمتلك أكثر من 20 فرعًا، وتحلم بالتوسع خارج حدود مصر، ويروي لنا كواليس التأسيس، وأسرار الخلطة، وخطط التوسع المستقبلي.
كيف بدأت فكرة تأسيس مطعم “عز المنوفي”؟
بدأت الفكرة من والدي، الحاج عز المنوفي – رحمه الله. كان شغال شيف في كذا دولة، ولما رجع قرر يفتح أول عربية كبدة وسجق في منطقة الدقي.
متى تم افتتاح أول فرع؟ وأين كان؟
أول فرع – اللي هو عربية الكبدة – تم افتتاحه سنة 1976 في حي الدقي.
ما الذي يميز “عز المنوفي” عن غيره من مطاعم الكبدة والسجق؟
اللي بيميزنا إننا – أولاده – لسه بنحضّر نفس خلطة التوابل السرية اللي عملها والدنا من 49 سنة. الخلطة دي بتتوزع على كل فروعنا اللي عددهم 20 فرع، ولسه فيه فروع جديدة هتتفتح السنة دي بإذن الله.
هل واجهتم تحديات في البداية؟ وكيف تم التغلب عليها؟
أكيد، أهم تحدي كان إقناع الناس بجودة المنتج، وده حصل مع الوقت والمجهود والإصرار. إن شاء الله كمان بنخطط نطلع ببراند “عز المنوفي” برّه مصر، وبدأنا نفكر فعليًا في دول زي الإمارات والسعودية.
ما السر وراء شهرة السندوتشات عندكم؟
السر إننا بنتقي ربنا في شغلنا، وبنستخدم أنضف خامات ممكن تلاقيها في السوق، رغم إن تكلفتها عالية. لكن أهم حاجة إننا نرضى عن الأكل قبل ما نقدمه لأي زبون.
كيف تحافظون على نفس الجودة والطعم في كل الفروع؟
فيه فريق مختص بيمر على الفروع بشكل منتظم، يراجع كل حاجة ويضمن إن الجودة واحدة في كل مكان.
هل تستخدمون وصفات خاصة أو توابل مميزة؟
طبعًا، عندنا توابل خاصة جدًا شغالين بيها من أيام والدنا من 49 سنة. والسنة الجاية إن شاء الله هنحتفل بمرور 50 سنة على أول عربية كبدة في مصر.
ما أهم المعايير التي تضعونها في اختيار اللحوم والمكونات؟
إحنا بنختار أفضل لحوم ومكونات موجودة في السوق، وبنتعامل مع موردين موثوقين، والزبون بنفسه بيشوف ده من جودة السندوتش اللي بياكله.
من هو جمهوركم الأساسي؟ الشباب؟ العائلات؟
الجميل إن زبائننا من كل الأعمار. شباب، وكبار، وعائلات. الزبون اللي بدأ ياكل عندنا وهو شاب، دلوقتي بييجي مع أولاده، وأولاده كمان بيكملوا معانا.
كيف استقبل الناس فكرة عربيات “عز المنوفي” في الشارع؟
الفكرة في الأول كانت تحدي، لكن مع الشغل الجاد والسمعة الكويسة، قدرنا نحول العربية لبراند شعبي كبير، وبإذن الله قريب هنكون موجودين في كل الدول العربية.
