السوبر ستار إسراء عاشور.. من الهواية إلى النجومية: أتقبل النقد وأتجاهل الهجوم طموحاتى ليس لها حدود.. وأحلم بالعالمية
القاهرة – إيهاب رضوان – وسيم السيسى:
في عالم السوشيال ميديا، الصورة دايمًا بتسبق الكلمة، والمظهر ممكن يخدع، لكن ورا كل صورة فيه إنسانة حقيقية، ليها مشاعر وطموحات وتفاصيل كتير ما بتبنش على الشاشات.
في الحوار ده، بنقرب أكتر من البلوجر والفاشونيستا إسراء عاشور، ونعرف منها الجانب اللي مش كل الناس تعرفه: بدايتها، شغفها بالفاشون، التحديات، والدروس اللي اتعلمتها في رحلتها.
عرفينا بنفسك للجمهور بشكل مختلف عن اللي بيشوفوه على السوشيال ميديا؟
“أنا بسيطة جدًا ومرحة، وده مش بيبان دايمًا في الصور أو الفيديوهات، بس اللي يعرفوني كويس من أصحابي وأهلي عارفين إني مش المظهر اللي الناس بتشوفه بس، لأن الشكل ساعات بيكون خادع”.
إمتى بدأ شغفك بعالم الفاشون والجمال؟
“من زمان جدًا وأنا بحب الموضة، الفاشون بالنسبالي مش مجرد لبس، هو طريقة للتعبير عن شخصيتي”.
هل دخولك المجال كان بالصدفة ولا كان في تخطيط من البداية؟
“الموضوع بدأ بشغف حقيقي، وفعلاً كان فيه دعم من ناس قريبة مني، زي سامح عاطف، اللي كان من أكتر الناس اللي شجعوني، ومن هنا بدأت أحوّل الشغف ده لطريق مهني”.
إيه أول محتوى نزلتيه وكان نقطة تحول ليكي؟
“كان فيديو بسيط عن ستايل يومي، لكن التفاعل عليه خلاني أحس إني على الطريق الصح، ومن وقتها بدأت أركز على المحتوى الهادف والمتقن”.
إزاي بتختاري نوع المحتوى اللي بتقدميه؟
“أنا مش بحب التقليد، ودايمًا بحاول يكون عندي شخصية وهوية خاصة. كل محتوى بقدمه لازم يكون بيعبر عني وعن أفكاري”.
إيه أكتر حاجة بتخليكي مبسوطة في شغلك كبلوجر؟
“لما بحس إن اللي بقدمه بيوصل للناس وبيأثر فيهم. الانتشار الهادف هو هدفي، مش مجرد أرقام”
هل في موقف غريب أو طريف حصل لك بسبب شهرتك على السوشيال؟
“كتير طبعًا، في مواقف بتضحكني وفي مواقف بتفكرني بقد إيه الناس بتابعني وبتحس إني قريبة منهم”.
شايفة إيه الفرق بين متابعين إنستجرام وتيك توك من حيث التفاعل؟ “
إنستجرام هو المنصة الأقرب لقلبي، وهو اللي حسيت إن الجمهور فيه فاهمني أكتر، لكن تيك توك طبعًا ليه جمهور مختلف ومميز”.
بتنصحي البنات بإيه قبل ما يشتروا أي حاجة جديدة؟
“خليكي دايمًا مقتنعة، إنه مش مهم الموضة ماشية إزاي، المهم اللي ترتاحي وتشوفي نفسك فيه”.
الجمال بالنسبة ليكي بيتمثل في إيه؟ ورأيك في عمليات التجميل؟ “
أنا مؤمنة إن الجمال الطبيعي هو أساس كل حاجة، ومش بحب عمليات التجميل لأنها ما بتعكسش الجمال الحقيقي للشخص”.
إيه أكتر تعليق أو رسالة أثرت فيكي من متابعينك؟
“في بنات كتير بتبعتلي إن اللي بقدمه غيرهم، وده أجمل شعور ممكن يبسطني”.
إزاي بتتعاملي مع الهجوم أو النقد؟
“بتجاهل الهجوم وبتقبل النقد البنّاء”.
هل كل أعمالك راضية عنها؟
“آه، راضية تمامًا لأن كل حاجة عملتها كنت مقتنعة بيها جدا”.
إيه هي هواياتك المفضلة؟
“بحب السفر جدًا لأنه بيغير مودّي وبيخليني أكتشف ثقافات جديدة، وبحب أكون دايمًا في أماكن مختلفة، خصوصًا اللي فيها بحر.. البحر بالنسبالي راحة نفسية مش طبيعية. كمان الشوبينج طبعًا! هو مش بس هواية، دي وسيلة بعبّر بيها عن ستايلي وشخصيتي، بالإضافة لممارسة الرياضة والجيم للحفاظ على رشاقتي لأنها جزء أساسي في عملي”.
إيه لونك المفضل؟
“الأسود”.
بتخافي من الحسد؟
“آه جدًا، وبؤمن بيه فعلًا”
مابتفكريش تعملي براند باسمك؟
“بفكر جدًا أعمل براند خاص بيا، علشان أكمل مسيرة النجاح وأقدم حاجة من قلبي للبنات”.
لو اتعرض عليكي التمثيل أو الإعلام تفضلي إيه؟
“أنا مش شايفة نفسي ممثلة، أحب الإعلام أكتر ولو هشتغل فيه هيكون في إطار هادف ومضمون يبشبهني”.
لو جالك عرض برنامج خاص بيكي.. هيكون عن إيه؟
“هيكون عن الفاشون والستايل وتطوير النفس، من غير ما يبقى مكرر أو مستهلك”.
إيه حلمك اللي لسه محققتهوش؟
“أعمل براند باسمي يعبر عن هويتي ومبادئي مش بس شهرة”
إزاي بتفصلي بين حياتك الشخصية والشغل أونلاين؟
“دي معادلة صعبة، لكن أنا بيتي ليه الأولوية الأولى بحاول أحتفظ بجزء خاص بيا بعيد عن السوشيال علشان أعيش حياة متوازنة”.
هل في حد بيدعمك دايمًا وبتعتبريه سبب رئيسي في نجاحك؟
“زي ما قولت، سامح عاطف كان من أكتر الناس اللي دعمتني وشجعتني في بدايتي”.لو قررتي تسيبي السوشيال ميديا، هيكون ليه؟ “لو سبتها، هيكون لأن شفت إن فيه حاجة أهم أو لأن المجال مبقاش بيعبر عني، لكن طول ما فيه هدف وتأثير، هفضل مستمرة”.
