القاهرة – محمد عبدالصبور:
في لقاء شيّق جمعنا بالدكتورة نور عثمان، أخصائية طب الأسنان، حدثتنا عن بدايتها، والتحديات اللي واجهتها، وأحدث التقنيات اللي بتستخدمها في العيادة، بالإضافة لنصائحها الذهبية للأطفال للحفاظ على صحة الفم والأسنان.
في البداية، نحب نعرف من حضرتك يا دكتورة نور، إزاي بدأتي مشوارك في مجال طب الأسنان؟
أنا بدأت أهتم بمجال طب الأسنان وأنا لسه في المرحلة الثانوية. السبب الأساسي كان إن دايمًا الناس بتخاف من دكتور الأسنان، وبيبقى عندهم رعب حقيقي من الزيارة.
فقررت إني أغير الصورة دي، وأسهل الموضوع على المرضى، وأخلي الجلسة مريحة أكتر، وأتعامل مع مخاوفهم بهدوء.كمان، أنا من عائلة كلها دكاترة. والدتي كانت طبيبة أطفال، وأختي تخصصها نساء وتوليد. فطبيعي إن يكون عندي حلم إني أكون دكتورة. لكن اختياري لطب الأسنان بالتحديد كان نابع من رغبتي في كسر حاجز الخوف عند المرضى.
عرفنا إنك بتستخدمي تقنيات حديثة جدًا في العلاج، إزاي بتتابعي التطور المستمر ده؟
حاليًا، طب الأسنان بيتطور بشكل سريع جدًا. كل يوم في تقنيات وأجهزة جديدة بتسهل العلاج على الطبيب والمريض. مثلًا، حشو العصب كان زمان بيتعمل في ٤ جلسات، دلوقتي ممكن نعمله في جلسة واحدة لا تتجاوز نص ساعة، بفضل الأجهزة الحديثة.
إحنا دايمًا بنسعى نواكب التطور، من خلال حضور المؤتمرات والورش داخل مصر وخارجها، علشان نكون دايمًا في الصدارة.
شايفين توسع جميل في شغلك، هل في نية لفتح فروع جديدة؟
إحنا بالفعل فتحنا فرع تاني في مدينة السويس، وده لأن كان في عدد كبير من المرضى بيجوا من السويس للقاهرة. فقررنا نقرّب المسافة عليهم. وإن شاء الله مستمرين في التوسع، ونفكر نفتح فروع في محافظات تانية بإذن الله.
إيه أهم النصائح اللي ممكن توجهيها للأطفال علشان يحافظوا على أسنانهم؟
أهم حاجة الوقاية خير من العلاج. لازم نحافظ على نظافة الأسنان، لأن دي جزء حساس جدًا في جسمنا. التغذية غير الصحية، وأكل الحلويات، وعدم تنظيف الأسنان، كل ده بيؤدي للتسوس ومشاكل أكبر.
أنصح كل طفل:
• يغسل سنانه ٣ مرات يوميًا.
• يقلل من السكريات.
• يزور طبيب الأسنان كل ٦ شهور، حتى لو ما عندوش مشكلة، علشان نكتشف أي حاجة صغيرة قبل ما تكبر.
• والتنظيف الاحترافي لازم يتعمل مرتين في السنة.
مر عليكي حالة غريبة أو صعبة في مجال الأسنان؟
أكيد. في حالات بتكون أسنانها كلها متآكلة أو مسوسة، والمريض بيبقى عنده وقت قصير جدًا علشان يسافر أو يلحق شغله.
وده بيصعّب الأمور، لأن بعض العلاجات بتحتاج وقت، زى التركيبات اللي لازم تتحضر بدقة وتتعرض للحرارة، وفيه علاج بيحتاج مضادات حيوية تشتغل فترة كافية.
أكتر حاجة بتصعب عليا هي عنصر “الوقت”. عشان كده لازم نزور دكتور الأسنان باستمرار، ومانستناش لحد ما المشكلة تكبر.
