القاهرة – إيهاب رضوان:
في قلب حدائق القبة بالقاهرة، ومن جذور الصعيد بمحافظة المنيا، بدأت قصة كفاح تحوّلت إلى نموذج يُحتذى به في ريادة الأعمال.. إنه الحاج محمد يحيى عبدالوهاب، صاحب “الوهاب موتورز”، الرجل الذي بدأ حياته في مجال المواد الغذائية، لكن سرعان ما قرر أن يقلب موازين اللعبة ويدخل عالم السيارات بطريقة مختلفة.. بعقلية “العميل أولاً”.
لم يكن يملك رأس مالًا ضخمًا، ولا شبكة علاقات واسعة، لكنه امتلك ما هو أهم: النية الطيبة، والإصرار، والثقة في الله.
في هذا الحوار الخاص، يكشف لنا الحاج محمد يحيى عن تفاصيل رحلته، وتحدياته، وسر نجاحه، وكيف يمكن لأي شاب أن يبدأ مشروعه دون رأسمال.
البداية من المواد الغذائية.. والنقلة لسوق السيارات
كنت تعمل في مجال الأغذية.. كيف حدث التحول لعالم السيارات؟
– أنا بدأت في مجال المواد الغذائية، ولكن الأمور لم تكن على ما يرام، فقررت في 2020 أن أغامر وحولت النشاط ودخلت مجال السيارات. مش لأن عندي خلفية كبيرة، ولكن لأن التجارة تحتاج جرأة ومخاطرة، ورجل المبيعات يقدر يبيع أي حاجة.”
من غير فروق سعر.. فكرة بسيطة قلبت السوق
إيه الفكرة اللي خلت شغلك ينجح في سوق صعب زى العربيات؟
– العميل بيجيلي بمبلغ معين في دماغه، فبدور له على عربية مناسبة من غير ما نحمل صاحب العربية أي مصاريف. بناخد بس كوميشن بسيط بالتراضي. بنبيع بنفس السعر اللي المالك حاطه من غير ما نزود السعر زي معارض تانية بتعمل كده، كمان بنشتري بأقل سعر للعميل. مفيش استغلال.
“الكشف الإجباري”.. والضمان اللي مطمن الناس
ليه الناس واثقة فيك؟
– أي عربية لازم يتكشف عليها قبل البيع. ولو طلع فيها مشكلة ما ذكرهاش البايع، هو اللي بيتحمل تكلفة الكشف، وده خلي العميل يتطمن إنه مش هيتضحك عليه. وكمان بقينا بنشغل مراكز كشف معانا، ففتحنا باب رزق لناس كتير.
السوشيال ميديا.. سلاح النجاح في إيدين الجدعان
إزاي قدرت توصل للناس؟
– السوشيال ميديا فرقت معايا جدًا. كنت بطلع لايفات والناس بتشوف كل حاجة على الطبيعة. ده خلق ثقة. دلوقتي ناس كتير بتبعتلي عربون قبل ما تشوف العربية. بيقولولي: إحنا واثقين فيك، هاتلنا عربية.
بعد البيع.. خدمة ولا أروع
بتعمل إيه للعميل بعد البيع؟
– أنا بتابع معاه، ومابسبهوش لو فى أي مشكلة واجهته مهما كان حتى ولو عايز يبيع تاني، أنا بجبله فيها أعلى سعر أو على الأقل التمن اللى دفعوا فيها. وكله بيتم في المكتب: العقود، التسجيل، نقل الملكية. العميل مش بيمشي خطوة من غيري، وبحافظ على حقه 100%.
“بيع كتير.. اكسب قليل” = قاعدة النجاح
إزاي كسبت في وسط منافسة شرسة؟
أنا عملت قاعدة لكل التُجار: بيع قليل تكسب كتير. والحمد لله العربيات مش بتقعد وبتتباع، سيستم حطيته لينا وللتجار والكل ماشي عليه.
في هجوم عليك كتير من بعض التجار الآخرين
– فعلًا في تجار كتير هاجموني وقالولي: إنت خسرتنا. لكن أنا ببيع بسعر طبيعي، واللي بيحط ربنا قدامه دايمًا بيكسب.
مبادرات للمجتمع.. من قلب الناس للناس.
شاركت في مبادرات مجتمعية؟ أو بمعنى أوضح عملت عروض كسرت الدنيا
– ده حقيقي عملت عروض كتير، منها لضباط الصف واللي على المعاش. ساعدت ناس كتير تشتري عربيات من غير كوميشن. عملنا مبادرات في شبرا والإسكندرية مع تجار هناك، وكل ده من غير مقابل مادي كبير. دي رسالة قبل ما تكون تجارة.
مشوار النجاح مستمر.. والخطط المستقبلية، وصلت لفين.. وإيه اللي جاي؟
أنا دلوقتي عندي 10,000 عميل، وبإذن الله في 2026 نوصل للضعف. عندي فرع في مدينة نصر، وبتمنى أفتح فروع تانية. طول ما النية كويسة وبراعي ربنا، ربنا بيديني وبيكرمني.”أنا موظف عند العميل”
محمد يحيى تحب توجه كلمة للعملاء بتوعك؟
بقولهم أنا موظف عندكم، الأولوية بالنسبالي هم العملاء.
الناس اللي وثقت فيا هم سبب كل اللي أنا فيه. أنا شقيت وتعبت وربنا كرّمني.
لو ربنا رزقك بثقة الناس، حافظ عليها، ومتخدعهمش أبدًا، نصيحة محمد يحيى للشباب:
بقولهم إياكم والكسل، أي حد يقدر يبدأ مشروع بدون رأسمال.
بس اشتغل، اسعى، وربنا هيكرمك. الكلمة الطيبة، والأمانة، والمصداقية هي سلاحك للنجاح.
